તહેવાર

ઇરા સ્કૂલ, દેવગઢ બારીયા ખાતે શ્રદ્ધા અને ભક્તિભાવપૂર્વક 'ગુરુ પૂજન' કાર્યક્રમ યોજાયો દેવગઢ બારીયા: દેવગઢ બારીયા સ્થિત ઇરા સ્કૂલ ખાતે ગુરુપૂર્ણિમાના પાવન પર્વ નિમિત્તે વિશેષ ‘ગુરુ પૂજન’ કાર્યક્રમનું ભવ્ય આયોજન કરવામાં આવ્યું હતું. શ્રદ્ધા, આદર અને ઉત્સાહસભર વાતાવરણમાં યોજાયેલા આ કાર્યક્રમમાં શાળાના તમામ શિક્ષકો અને વિદ્યાર્થીઓ ભાવવિભોર થઈને જોડાયા હતા. અજ્ઞાનરૂપી અંધકારને દૂર કરી જ્ઞાનનો પ્રકાશ ફેલાવનાર ગુરુનું સ્થાન ભારતીય સંસ્કૃતિમાં સર્વોચ્ચ માનવામાં આવ્યું છે. આ ઉજવણીનો મુખ્ય હેતુ વિદ્યાર્થીઓમાં પ્રાચીન ગુરુ-શિષ્ય પરંપરાનું મહત્વ જળવાઈ રહે, તેમનામાં વિનમ્રતા અને સંસ્કારોનું સિંચન થાય તેમજ પોતાના માર્ગદર્શક શિક્ષકો પ્રત્યે કૃતજ્ઞતા વ્યક્ત થાય તે હતો. કાર્યક્રમ દરમિયાન શાળાના તમામ વિદ્યાર્થીઓએ શાસ્ત્રોક્ત વિધિ અને અત્યંત આદરભાવ સાથે પોતાના ગુરુજનોનું પૂજન કર્યું હતું. વિદ્યાર્થીઓએ શિક્ષકોને તિલક કરી, પુષ્પ અર્પણ કરીને તેમના ચરણ સ્પર્શ કરી આશીર્વાદ મેળવ્યા હતા. આ પ્રસંગે બાળકો દ્વારા ગુરુ મહિમા ગાતા ભજનો અને પ્રેરણાદાયી વક્તવ્ય પણ રજૂ કરવામાં આવ્યા હતા. કાર્યક્રમના અંતે વિદ્યાર્થીઓ અને શાળા સંચાલકો દ્વારા તમામ ગુરુજનોના નિષ્ઠાપૂર્વકના માર્ગદર્શન અને યોગદાન બદલ હૃદયપૂર્વક આભાર વ્યક્ત કરવામાં આવ્યો હતો. શિક્ષકોએ પણ તમામ વિદ્યાર્થીઓને જીવનમાં સફળતા મેળવવા અને સન્માર્ગે ચાલવાના આશીર્વાદ પાઠવ્યા હતા. સમગ્ર કાર્યક્રમ ખૂબ જ પ્રેરણાદાયી અને ભક્તિમય વાતાવરણમાં સંપન્ન થયો હતો.