Politics News

મયુર મોકાશી: ધરમપુર વિસ્તારના નાગરિકો માટે જાહેર પરિવહન ક્ષેત્રે એક મહત્વપૂર્ણ દિવસ સાબિત થયો છે. આજરોજ ધરમપુર બસ ડેપો ખાતે સરકારશ્રી દ્વારા ફાળવવામાં આવેલી કુલ ૬ નવી મીની બસોનું લોકાર્પણ કરવામાં આવ્યું હતું. આ કાર્યક્રમમાં ધરમપુર તાલુકા પંચાયત પ્રમુખ શકુન્તલાબેન ચૌધરી અને ધારાસભ્ય અરવિંદભાઈ પટેલના હસ્તે રીબીન કાપીને આ નવી બસોને સત્તાવાર રીતે ખુલ્લી મૂકવામાં આવી હતી. આ પ્રસંગે બીજેપી અગ્રણી ગણેશ બિરારી, એસટી ડેપો મેજનેર તેમજ ફરજ પરનો સ્ટાફ અને ધરમપુર બસ ડેપોના ઉચ્ચ અધિકારીઓ પણ વિશેષ ઉપસ્થિત રહ્યા હતા. આ નવી બસોના પ્રારંભ થવાથી ખાસ કરીને કપરાડા તાલુકાના અને ધરમપુર તાલુકાના ગામોમાં બસની સુવિધાનો વ્યાપ વધશે, જેના કારણે ગ્રામીણ અને અંતરિયાળ વિસ્તારોમાં રહેતા નાગરિકો માટે જાહેર પરિવહન સેવાઓ વધુ સુવિધાજનક, સુરક્ષિત અને સરળ બનશે. અત્યાર સુધી દુરસ્થ અને ગ્રામીણ વિસ્તારોમાં પૂરતી વાહનવ્યવહારની સુવિધાઓના અભાવે લોકોને અવરજવર કરવામાં પડતી મુશ્કેલીઓ હવે દૂર થશે. આ નવી મીની બસો શરૂ થવાથી દૈનિક અવરજવર કરતી જનતાને મોટી રાહત મળશે. ખાસ કરીને વિદ્યાર્થીઓની શૈક્ષણિક સફર, રોજગાર અર્થે જતા યુવાનો તેમજ નાગરિકો માટે આરોગ્ય જેવી અત્યંત આવશ્યક સેવાઓ સુધી સમયસર પહોંચવું વધુ સરળ બનશે. એટલું જ નહીં, આવનાર સમયમાં ધરમપુર એસટી ડેપોને હજુ પણ વધુ ૪ બસો મળવાની છે, જેના કારણે આગામી દિવસોમાં આ સેવાઓ વધુ વ્યાપક બનશે. જાહેર પરિવહન વ્યવસ્થાને વધુ મજબૂત અને સશક્ત બનાવતું તેમજ જનસુવિધાઓમાં મોટો વધારો કરતું આ એક અત્યંત મહત્વપૂર્ણ પગલું છે, જે ધરમપુર વિસ્તારના વિકાસની દિશામાં વધુ એક સકારાત્મક પહેલ સાબિત થઈ છે.

જય મહારાજ ગુજરાત પ્રદેશ કોંગ્રેસ સમિતિના માનનીય પ્રમુખ શ્રી અમિતભાઈ ચાવડાએ મારા પર વિશ્વાસ વ્યક્ત કરીને નડિયાદ મહાનગરપાલિકામાં કોંગ્રેસ પક્ષના વિરોધ પક્ષના નેતા તરીકે જે જવાબદારી સોંપી છે, તે બદલ હું તેમનો હૃદયપૂર્વક આભાર વ્યક્ત કરું છું. આ સન્માન માત્ર મારું નથી, પરંતુ નડિયાદ શહેરના દરેક વડીલો આગેવાનો, શુભેચ્છકો અને જનતાના અવિરત સાથ, સહકાર અને વિશ્વાસનું પરિણામ છે. આપ સૌએ દિવસ-રાત મારી સાથે રહીને જે પ્રેમ, પ્રોત્સાહન અને સહયોગ આપ્યો છે, તેના કારણે જ આજે મને ફરી એકવાર પક્ષની મહત્વપૂર્ણ જવાબદારી નિભાવવાની તક મળી છે. હું આપ સૌનો દિલથી આભારી છું અને વિશ્વાસ અપાવું છું કે આ જવાબદારીને સંપૂર્ણ નિષ્ઠા, પ્રામાણિકતા અને જનહિતને સર્વોપરી રાખીને નિભાવીશ. નડિયાદ શહેરના લોકોના પ્રશ્નોને વધુ મજબૂતાઈથી ઉઠાવી તેમના હિત માટે સતત સંઘર્ષ કરતો રહીશ. આગામી સમયમાં પણ આપ સૌનો આવો જ પ્રેમ, માર્ગદર્શન અને સાથ મળતો રહેશે તેવી આશા સાથે... આપ સૌનો હૃદયપૂર્વક આભાર. હાર્દિક ભટ્ટ વિરોધ પક્ષના નેતા નડિયાદ મહાનગરપાલિકા

મયુર મોકાશી: ધરમપુર તાલુકાના વાઘવળ ગામના બારસી ફળિયામાં ઉનાળાની શરૂઆતથી જ ભૂગર્ભ જળસ્તર નીચે ઉતરી જતા પાણીની ગંભીર સમસ્યા સર્જાઈ હતી. પાણી ન નીકળવા છતાં લોકો અજાણ હોવાથી હેન્ડલ સતત મારતા રહ્યા, જેના કારણે ગત ૨૯ એપ્રિલના રોજ હેન્ડપંપ બગડી ગયો હતો અને ભારે ઉનાળે ફળિયામાં પાણીની વિકટ તંગી સર્જાઈ હતી. આ અંગે ૧૯૧૬ પર ફરિયાદ કરવામાં આવતા રિપેરિંગ ટીમ આવી તો હતી, પરંતુ હેન્ડપંપના પાઇપ માત્ર ૧૩૦ ફૂટ સુધીની જ મર્યાદામાં હતા, જ્યારે વાસ્તવિક પાણીનું સ્તર ૧૬૦ ફૂટથી વધુ ઊંડું હોવાથી કામ થઈ શક્યું નહોતું. પરિણામે ફળિયાવાસીઓએ સતત ત્રણ મહિના સુધી ભારે મુશ્કેલીઓ વેઠવી પડી હતી. આ દરમિયાન લોકો ખાનગી મોટરવાળા પાસેથી પાણી મેળવતા અને અમુક વરસાદ વરસતા મજબૂરીવશ ઝરણાંનું પાણી પીતા હતા. પાછળથી અતિભારે વરસાદની સ્થિતિ સર્જાતા વીજળી બંધ કરી દેવામાં આવી હતી જેથી મોટરથી પાણી મળી શકે તેમ નહોતું અને ઝરણાંનું પાણી પીવાથી ગંભીર રોગચાળો ફાટી નીકળવાનો ભય સતાવી રહ્યો હતો. આ કપરા સમયમાં વરસાદનું જોર ઓછું થતાં જ ધરમપુરના GWSSB ના નાયબ કાર્યપાલક ઇજનેર શ્રીમતી દીપકાબેન જે. પટેલને ટેલિફોનિક જાણ કરી સમગ્ર પરિસ્થિતિથી માહિતગાર કરવામાં આવ્યા હતા. તેમણે ફળિયાના પરિવારોની વેદના ત્વરિત સમજીને તાત્કાલિક પોતાની હેન્ડપમ્પ રિપેરિંગ ટીમને આદેશ આપ્યા હતા. પરિણામે, બીજા જ દિવસે વિશાલ, અંકિત, લવલી, રિંકુ અને રિયાન્સભાઈની ટીમ ચાલુ વરસાદની પ્રતિકૂળ પરિસ્થિતિમાં પણ વાઘવળ ગામે દોડી આવી હતી અને યુદ્ધના ધોરણે હેન્ડપંપ રિપેર કરી આપ્યો હતો. આમ, આટલી લાંબી હાલાકી બાદ આખરે ત્રણ મહિના પછી પરિવારને સરકારી યોજનાનું શુદ્ધ પાણી મળ્યું છે, જે બદલ બારસી ફળિયાના તમામ પરિવારો દ્વારા નાયબ કાર્યપાલક ઇજનેર શ્રીમતી દીપકાબેન પટેલ અને તેમની સમગ્ર ટીમનો હૃદયપૂર્વક આભાર માનવામાં આવ્યો છે.