Health News

બાયડ ડેપો ના ડેપો મેનેજર શ્રી એસ બી પરમાર સાહેબ સહયોગ થી બાયડ ડેપો ખાતેદ્રાયવર તેમજ કંડકટર મિત્રો નેમજ મિકેનિકલ વિભાગ ના દરેક સ્ટાફ ગણ મિત્રો ને બી. પી. આખો ની તપાસ કરવામાં આવી ડ્રાયવર કંડક્ટર મિત્રો ખુબ મોટી સંખ્યા મા ભાગ લઇ ને ખુશી વ્યક્ત કરી

*સ્વસ્થ ભવિષ્ય માટે આયુર્વેદ: ૧૧મો રાષ્ટ્રીય આયુર્વેદિક દિવસ 23 સપ્ટેમ્બર* ભારતની સંસ્કૃતિ વિશ્વની સૌથી પ્રાચીન અને સમૃદ્ધ સંસ્કૃતિઓમાંની એક છે. આ સંસ્કૃતિમાં આયુર્વેદ એક મહત્ત્વનું અને અમૂલ્ય અંગ છે. આયુર્વેદ ભારતીય જીવનશૈલી, ફિલસૂફી અને પ્રકૃતિ સાથેના ઊંડા સંબંધનું પ્રતીક છે. તે આપણી સંસ્કૃતિની ઊંડાઈ, જ્ઞાન અને સ્વાસ્થ્ય પ્રત્યેની સમજને સુંદર રીતે વ્યક્ત કરે છે. ૨૩ સપ્ટેમ્બર ૨૦૨૬ના રોજ દેશભરમાં ૧૧મો રાષ્ટ્રીય આયુર્વેદિક દિવસ ઉજવવામાં આવી રહ્યો છે. આ વર્ષનું થીમ છે “સ્વસ્થ ભવિષ્ય માટે આયુર્વેદ”. આ થીમ આપણને યાદ અપાવે છે કે આયુર્વેદ માત્ર પરંપરા નથી, પરંતુ સ્વસ્થ અને સુખી જીવનનો વૈજ્ઞાનિક માર્ગ છે. આયુર્વેદ શબ્દ બે ભાગથી બનેલો છે – “આયુ” એટલે જીવન અને “વેદ” એટલે વિજ્ઞાન. આ વિજ્ઞાન ૫૦૦૦ વર્ષથી વધુ જૂનું છે અને તેનું મૂળ ઋગ્વેદમાં જોવા મળે છે. આયુર્વેદ મન, શરીર અને આત્માના સંતુલન પર ભાર મૂકે છે. તે પ્રકૃતિ સાથે સુમેળ, સંતુલિત આહાર અને નિયમિત જીવનશૈલી દ્વારા સ્વાસ્થ્ય જાળવવાનું શીખવે છે. સરકારે ૨૩ સપ્ટેમ્બરને આયુર્વેદિક દિવસ તરીકે નિયત તારીખ બનાવી છે. આ તારીખ શરદ સંપાત સાથે મેળ ખાય છે, જે પ્રકૃતિમાં સંતુલનનું પ્રતીક છે. આયુર્વેદ પણ સંતુલનનું વિજ્ઞાન છે. આ વર્ષે દેશભરમાં હજારો કાર્યક્રમો યોજાઈ રહ્યા છે. લાખો નાગરિકોએ આયુર્વેદ માટે પ્રતિજ્ઞા લીધી છે અને અનેક દેશોમાં પણ આ દિવસની ઉજવણી થઈ રહી છે. આયુર્વેદના મુખ્ય સિદ્ધાંતો ખૂબ સરળ અને ઉપયોગી છે. સાત્વિક અને મોસમી આહાર લેવો, નિયમિત વ્યાયામ અને યોગ કરવો, પર્યાપ્ત નિદ્રા લેવી અને માનસિક શાંતિ જાળવવી આ બધું સ્વસ્થ જીવનનો આધાર છે. આયુર્વેદમાં વપરાતા ઔષધીય છોડ પ્રકૃતિમાંથી મળે છે અને તે શરીરને કુદરતી રીતે મજબૂત બનાવે છે. સરકારની આયુષ મંત્રાલય દ્વારા આયુર્વેદને વધુ મજબૂત બનાવવામાં આવી રહ્યું છે. આયુષમાન આરોગ્ય મંદિરો, સંશોધન કેન્દ્રો અને ટેલીમેડિસિન સેવાઓ દ્વારા વધુને વધુ લોકો સુધી આ જ્ઞાન પહોંચી રહ્યું છે. આયુર્વેદ હવે વૈશ્વિક સ્તરે પણ માન્યતા મેળવી રહ્યું છે. સ્વસ્થ ભવિષ્ય માટે આપણે આયુર્વેદના સિદ્ધાંતોને રોજિંદા જીવનમાં અપનાવી શકીએ. બાળકોને સંતુલિત આહાર અને સ્વસ્થ આદતો શીખવી શકીએ. ઘરે ઔષધીય છોડ ઉગાડી શકીએ. યોગ અને પ્રાણાયામનો અભ્યાસ કરી શકીએ. આયુર્વેદ આપણને શીખવે છે કે સ્વાસ્થ્ય એ માત્ર શરીરની બાબત નથી, પરંતુ સંપૂર્ણ જીવનની કળા છે. ૧૧મો રાષ્ટ્રીય આયુર્વેદિક દિવસ આપણને આ પ્રાચીન વિજ્ઞાનને અપનાવવા અને સ્વસ્થ ભવિષ્ય ઘડવા માટે પ્રેરણા આપે છે. ચાલો, આ થીમને જીવનમાં ઉતારીએ અને આયુર્વેદની સાથે સ્વસ્થ, સુખી અને સંતુલિત જીવન જીવીએ. રાજેન્દ્ર મકવાણા માલપુર

વ્યારામાં ૩૧૭ બેડની અદ્યતન યુ.એન.એમ. ટ્રાન્ઝિશનલ હોસ્પિટલનું લોકાર્પણ, ૮૦૦ બેડની નવી હોસ્પિટલનું ખાતમુહૂર્ત વ્યારા: તાપી જિલ્લાના મુખ્ય મથક વ્યારામાં આદિજાતિ વિસ્તારના લોકોને અદ્યતન અને ગુણવત્તાસભર આરોગ્ય સેવાઓ નજીકના સ્થળે મળી રહે તે દિશામાં મહત્વપૂર્ણ પહેલ કરવામાં આવી છે. મુખ્યમંત્રી શ્રી ભૂપેન્દ્ર પટેલના હસ્તે વ્યારામાં ૩૧૭ બેડની અતિઆધુનિક યુ.એન.એમ. ટ્રાન્ઝિશનલ હોસ્પિટલનું લોકાર્પણ કરવામાં આવ્યું હતું. સાથે જ રાજ્ય સરકાર સાથે પી.પી.પી. મોડેલ પર આકાર પામી રહેલા યુ.એન.એમ. મેડિકલ કોલેજ અને જનરલ હોસ્પિટલ પ્રોજેક્ટ અંતર્ગત નવી ૮૦૦ બેડની હોસ્પિટલનું ભૂમિપૂજન પણ કરવામાં આવ્યું હતું. વડાપ્રધાન શ્રી નરેન્દ્રભાઈ મોદીની જનસેવાના ૨૫ વર્ષ પૂર્ણ થવાના અવસરે દેશભરમાં ચાલી રહેલા સેવા સંકલ્પ અભિયાન અંતર્ગત તાપી સહિતના અંતરિયાળ આદિજાતિ વિસ્તારોના લોકોને અદ્યતન આરોગ્ય સુવિધાઓની ભેટ મળી છે. મુખ્યમંત્રી શ્રી ભૂપેન્દ્ર પટેલે નવનિર્મિત હોસ્પિટલ પરિસરની મુલાકાત લઈ વિવિધ અદ્યતન સુવિધાઓનું નિરીક્ષણ કરી તેની માહિતી મેળવી હતી. નવી ૩૧૭ બેડની ટ્રાન્ઝિશનલ હોસ્પિટલમાં વ્યારા જનરલ હોસ્પિટલમાં હાલમાં કાર્યરત તબીબી સેવાઓ અને દર્દીઓની સારવારનું સ્થળાંતર કરવામાં આવશે. નવી ૮૦૦ બેડની હોસ્પિટલના નિર્માણ દરમિયાન દર્દીઓને સારવારમાં અગવડ ન પડે અને આરોગ્ય સેવાઓ સતત ચાલુ રહે તે હેતુથી હાલના હોસ્પિટલ કેમ્પસમાં જ આ ટ્રાન્ઝિશનલ સુવિધા વિકસાવવામાં આવી છે. આ સમગ્ર પ્રોજેક્ટ અંતર્ગત વ્યારામાં આગામી સમયમાં ૧૫૦ બેઠકોની MBBS મેડિકલ કોલેજ, વિદ્યાર્થીઓ માટે હોસ્ટેલ સહિતનું વિશાળ હેલ્થકેર હબ વિકસાવવામાં આવશે. અંદાજિત રૂ. ૯૧૦ કરોડના આ સમગ્ર પ્રોજેક્ટને યુ.એન.એમ. ફાઉન્ડેશન દ્વારા હાથ ધરવામાં આવશે. પ્રોજેક્ટ પૂર્ણ થયા બાદ તાપી ઉપરાંત ગુજરાત અને મહારાષ્ટ્રના સરહદી વિસ્તારોના આશરે ૮ લાખથી વધુ લોકોને નજીકના સ્થળે જ અદ્યતન આરોગ્ય સેવાઓનો લાભ મળી શકશે. ૯,૯૮૬ ચોરસ મીટરના કાર્પેટ એરિયામાં વિકસાવવામાં આવેલી ૩૧૭ બેડની હોસ્પિટલમાં ૨૭૧ વોર્ડ બેડ અને ૪૬ ક્રિટિકલ કેર બેડનો સમાવેશ થાય છે. ૧૭ ક્લિનિકલ સ્પેશિયાલિટીઝ માટે ૨૪ સમર્પિત OPD રૂમ ઉપલબ્ધ કરાવવામાં આવ્યા છે, જેના કારણે દૈનિક આશરે ૧,૨૦૦ દર્દીઓને OPD સેવા આપી શકાશે. હોસ્પિટલમાં ૩ મેજર સર્જરી અને ૧ સીઝેરિયન તથા મેટરનિટી સેવાઓ માટે કુલ ૪ સુસજ્જ ઓપરેશન થિયેટર ઉપરાંત ER Minor OT અને Post-Mortem OTની સુવિધા પણ ઉપલબ્ધ છે. ક્રિટિકલ કેર માટે ૩૪ ICU બેડ, ૧૨ NICU/PICU બેડ અને ૬ ER બેડની સુવિધા છે. આ ઉપરાંત અદ્યતન પેથોલોજી અને માઇક્રોબાયોલોજી લેબોરેટરી, બ્લડ સ્ટોરેજ સેન્ટર, X-Ray, USG, ૮ બેડનું ડાયાલિસિસ યુનિટ, CSSD, કાંગારૂ મધર કેર રૂમ અને NRC વોર્ડ જેવી સુવિધાઓ પણ ઉપલબ્ધ કરાવવામાં આવી છે. વ્યારામાં જ વિશિષ્ટ તબીબી સારવાર ઉપલબ્ધ થવાથી તાપી જિલ્લાના દર્દીઓને અદ્યતન સારવાર માટે આશરે ૭૫ કિલોમીટર દૂર સુરત જવાની જરૂરિયાતમાં ઘટાડો થશે. ખાસ કરીને આદિવાસી અને ગ્રામ્ય વિસ્તારના લોકોને પોતાના નજીકના વિસ્તારમાં જ ગુણવત્તાસભર આરોગ્યસેવા મળવાથી સમય અને ખર્ચ બંનેમાં રાહત મળશે. આ પ્રસંગે આદિજાતિ વિકાસ મંત્રી તથા તાપી જિલ્લાના પ્રભારી મંત્રી શ્રી નરેશભાઈ પટેલ, રમતગમત અને પ્રવાસન રાજ્ય મંત્રી ડૉ. જયરામભાઈ ગામીત, ટોરેન્ટ ગ્રુપના ડિરેક્ટર શ્રી જીનલ મહેતા, સાંસદ શ્રી પરભુભાઈ વસાવા, જિલ્લા પંચાયત પ્રમુખ શ્રીમતી ચંચળબેન ચૌધરી, ધારાસભ્યો શ્રી મોહનભાઈ કોંકણી અને શ્રી મોહનભાઈ ઢોડિયા, જિલ્લા અગ્રણી શ્રી સુરજભાઈ વસાવા, જિલ્લા કલેક્ટર શ્રી દેવ ચૌધરી સહિતના જનપ્રતિનિધિઓ, યુ.એન. મહેતા ગ્રુપના અધિકારીઓ, સ્ટાફ તથા વહીવટી તંત્રના અધિકારીઓ ઉપસ્થિત રહ્યા હતા.