સમીના રાફુ ગામની સગર્ભાની 108માં પ્રસુતિ: ગંભીર સ્થિતિમાં સગર્ભાની સફળ ડિલિવરી, માતા-નવજાતને સુરક્ષિત હોસ્પિટલ પહોંચાડ્યા"

રસ્તામાં જ સફળ પ્રસૂતિ કરાવી માતા અને નવજાતનો જીવ બચાવ્યો- સમીના રાફુ ગામની સગર્ભા મહિલાની ગંભીર સ્થિતિમાં 108ની ટીમ બની દેવદૂત, એમ્બ્યુલન્સમાં બાળકનો સુરક્ષિત જન્મ કરાવ્યો પાટણ જિલ્લાના સમી તાલુકાના રાફુ ગામમાં સગર્ભા મહિલાને પ્રસૂતિની પીડા ઉપડતાં પરિવારજનોએ તાત્કાલિક 108 એમ્બ્યુલન્સનો સંપર્ક કર્યો હતો. કોલ મળતાં જ BLS 108 EMRI ગ્રીન હેલ્થ સર્વિસની ટીમના EMT અલકા મકવાણા અને પાઇલટ રમેશભાઈ ભરવાડ તાત્કાલિક 108 એમ્બ્યુલન્સ સાથે ઘટનાસ્થળે પહોંચ્યા હતા. સગર્ભા મહિલાને પ્રાથમિક તપાસ અને જરૂરી સારવાર આપ્યા બાદ વધુ સારવાર માટે SDH સરકારી હોસ્પિટલ રાધનપુર લઈ જવામાં આવી રહી હતી. રાધનપુર તરફ જવાના માર્ગમાં ભદ્રાડા ગામ નજીક પહોંચતાં સગર્ભા મહિલાની સ્થિતિ ગંભીર હોવાનું જણાયું હતું. તપાસ દરમિયાન બાળકની સ્થિતિ Complete Breech Presentation એટલે કે બાળક ઊંધું હોવાની જટિલ પરિસ્થિતિ સામે આવી હતી. સાથે જ માતાનું હિમોગ્લોબિન (HB) પણ ઓછું હોવાનું જાણવા મળ્યું હતું. આવી કટોકટીની સ્થિતિમાં તાત્કાલિક પ્રસૂતિ કરાવવી અનિવાર્ય બની હતી.પરિસ્થિતિની ગંભીરતાને ધ્યાનમાં રાખીને EMT અલકા મકવાણાએ અમદાવાદ ખાતે 108ના ઇમરજન્સી રિસ્પોન્સ સેન્ટરના ડૉ. રુચિ મેડમનો સંપર્ક કરી નિષ્ણાત તબીબી માર્ગદર્શન મેળવ્યું હતું. ત્યારબાદ 108 એમ્બ્યુલન્સમાં ઉપલબ્ધ ડિલિવરી કીટ, જરૂરી સાધનો અને તાલીમબદ્ધ ટેકનિકનો ઉપયોગ કરીને અત્યંત સાવચેતીપૂર્વક એમ્બ્યુલન્સમાં જ સફળતાપૂર્વક પ્રસૂતિ કરાવવામાં આવી હતી. મહિલાએ પુત્રને જન્મ આપતાં પરિવારજનોમાં ખુશીની લાગણી છવાઈ ગઈ હતી. પ્રસૂતિ બાદ માતા અને નવજાત બાળકને વધુ સારવાર માટે SDH સરકારી હોસ્પિટલ રાધનપુર ખાતે સુરક્ષિત રીતે ખસેડવામાં આવ્યા હતા. કટોકટીની ઘડીમાં 108ની ટીમે સમયસર પહોંચીને, નિષ્ણાત તબીબી માર્ગદર્શન અને ઉપલબ્ધ સાધનોનો યોગ્ય ઉપયોગ કરી માતા અને બાળકને વધુ ગંભીર જોખમમાંથી બચાવવામાં મહત્વપૂર્ણ ભૂમિકા ભજવી હતી.આ પ્રસંશનીય કામગીરી બદલ પ્રોગ્રામ મેનેજર કમલેશભાઇ તથા EME જીગ્નેશભાઇ દ્વારા EMT અલકા મકવાણા અને પાઇલટ રમેશભાઈ ભરવાડની ટીમની કામગીરીને બિરદાવી પ્રશંસા કરવામાં આવી હતી.આમ, 108 એમ્બ્યુલન્સની સમયસૂચકતા, તબીબી કુશળતા અને માનવતાભરી સેવાથી કટોકટીના સમયે માતા અને નવજાત બાળકને તાત્કાલિક સહાય મળી હતી. 108ની ટીમની આ કામગીરી આરોગ્ય સેવાઓમાં સમર્પણ, જવાબદારી અને જીવ બચાવવાની પ્રતિબદ્ધતાનું ઉત્તમ ઉદાહરણ બની છે.રિપોર્ટર :-દશરથ ઠાકોર