Technology News

આસિક અલી ગીલાણી વિરમગામ. અમદાવાદ જીલ્લાના વિરમગામમા ન્યૂ એજ્યુકેશન હાઈસ્કૂલ ખાતે સાયબર ક્રાઈમ ટીમ દ્વારા વિદ્યાર્થીઓમાં સાયબર ગુનાઓ અંગે જાગૃતિ આવે તે હેતુથી વિશેષ સાયબર અવેરનેસ કાર્યક્રમ યોજાયો હતો.કાર્યક્રમ દરમિયાન વિદ્યાર્થીઓને ઓનલાઈન છેતરપિંડી, ફેક લિંક, OTP, સોશિયલ મીડિયા પર થતી છેતરપિંડી સહિતના સાયબર ગુનાઓથી બચવા અંગે જરૂરી માર્ગદર્શન આપવામાં આવ્યું હતું. અજાણી લિંક પર ક્લિક ન કરવું, OTP કે બેંકની ગુપ્ત માહિતી કોઈ સાથે શેર ન કરવી તેમજ શંકાસ્પદ ઓનલાઈન પ્રવૃત્તિ અંગે સાવચેત રહેવા સમજાવવામાં આવ્યું હતું.સાયબર ક્રાઈમ ટીમ દ્વારા વિદ્યાર્થીઓને સાયબર સુરક્ષા અંગે જાગૃત રહીને પોતે તેમજ પરિવારજનોને પણ સાવચેત રાખવા અપીલ કરવામાં આવી હતી. અખંડ ભારત

અરવલ્લીમાં જિલ્લા કક્ષાનો ‘નેશનલ સાયન્સ સેમિનાર-૨૦૨૬’ યોજાયો ‘Indian Energy Basket 2047’ વિષય પર વિદ્યાર્થીઓએ ઊર્જા ક્ષેત્રની સંભાવનાઓ અને પડકારો અંગે રજૂ કર્યા વિચારો મોડાસા, તા. 18: વિજ્ઞાન અને ટેકનોલોજી પ્રત્યે વિદ્યાર્થીઓમાં રસ, સર્જનાત્મકતા તથા વૈજ્ઞાનિક અભિગમ વિકસે અને દેશના ભાવિ ઊર્જા ક્ષેત્ર અંગે નવી પેઢી વિચારશીલ બને તે હેતુસર અરવલ્લી જિલ્લામાં જિલ્લા કક્ષાનો ‘નેશનલ સાયન્સ સેમિનાર-૨૦૨૬’ યોજાયો હતો. ગુજરાત કાઉન્સિલ ઓન સાયન્સ એન્ડ ટેકનોલોજી વિભાગની પ્રેરણાથી તથા ધી મ. લા. ગાંધી ઉચ્ચતર કેળવણી મંડળ સંચાલિત માતૃશ્રી રંજનાબેન પ્રતાપભાઈ ગોગીવાલા જિલ્લા લોકવિજ્ઞાન કેન્દ્ર, અરવલ્લી દ્વારા તા. ૧૭ સપ્ટેમ્બર, ૨૦૨૬ના રોજ યુ.જી.સી. બી.એડ. કોલેજ કેમ્પસ, મોડાસા ખાતે આ સેમિનારનું આયોજન કરવામાં આવ્યું હતું. આ વર્ષે સેમિનારનો મુખ્ય વિષય “Indian Energy Basket 2047: Prospects and Challenges – ભારતીય ઊર્જા બાસ્કેટ ૨૦૪૭: સંભાવનાઓ અને પડકારો” રાખવામાં આવ્યો હતો. વિષયને કેન્દ્રમાં રાખીને અરવલ્લી જિલ્લાના વિવિધ તાલુકાઓમાંથી વિદ્યાર્થીઓએ ભાગ લીધો હતો. વિદ્યાર્થીઓએ વર્ષ ૨૦૪૭ સુધીમાં ભારતની વધતી ઊર્જા જરૂરિયાતો, ઊર્જાના વિવિધ સ્ત્રોતો, નવીનીકરણીય ઊર્જા, ઊર્જા સંરક્ષણ તેમજ ઊર્જા ક્ષેત્રમાં આવનારા પડકારો અને તેની સંભવિત તકો અંગે પોતાના વિચારો રજૂ કર્યા હતા. વિદ્યાર્થીઓએ સંશોધનાત્મક અભિગમ સાથે રજૂ કર્યા વિચારો સેમિનારમાં વિદ્યાર્થીઓએ માત્ર વિષયનું વાંચન કે વર્ણન જ નહીં, પરંતુ પોતાના અભ્યાસ, સંશોધન અને સમજના આધારે વિવિધ મુદ્દાઓને પ્રેઝન્ટેશનના માધ્યમથી રજૂ કર્યા હતા. ભારતની ઊર્જા જરૂરિયાતોને પહોંચી વળવા માટે સૌર ઊર્જા, પવન ઊર્જા સહિતના વૈકલ્પિક ઊર્જા સ્ત્રોતોનો વ્યાપ વધારવા, ઊર્જા બચત અને કાર્યક્ષમ ઉપયોગ અંગે પણ વિદ્યાર્થીઓએ પોતાના વિચારો રજૂ કર્યા હતા. વિદ્યાર્થીઓની રજૂઆતોમાં વર્ષ ૨૦૪૭ના વિકસિત ભારતને ધ્યાનમાં રાખીને ઊર્જા ક્ષેત્રની જરૂરિયાતો તથા સંભાવનાઓને વૈજ્ઞાનિક દૃષ્ટિકોણથી સમજાવવાનો પ્રયાસ જોવા મળ્યો હતો. જેના કારણે સમગ્ર સ્પર્ધામાં ઉત્સાહભર્યું તથા તંદુરસ્ત સ્પર્ધાત્મક વાતાવરણ સર્જાયું હતું. મૈત્રીસ ગોસાઈ પ્રથમ, હેનીલ બોદર દ્વિતીય જિલ્લા કક્ષાની આ સ્પર્ધામાં ડેમાઈની GIPS સ્કૂલના વિદ્યાર્થી ગોસાઈ મૈત્રીસ જે.એ પ્રથમ સ્થાન પ્રાપ્ત કર્યું હતું. જ્યારે ટાકાટુકા, ભિલોડાની એસ.ડી. વ્યાસ હાઈસ્કૂલના વિદ્યાર્થી બોદર હેનીલ એમ.એ દ્વિતીય સ્થાન અને આ જ શાળાના ડામોર મયંક એલ.એ તૃતીય સ્થાન મેળવ્યું હતું. વિજેતા વિદ્યાર્થીઓને તેમના ઉત્કૃષ્ટ પ્રદર્શન બદલ પ્રમુખશ્રી મહેન્દ્રભાઈ વી. શાહ તથા મંત્રીશ્રી ડૉ. આર.સી. મહેતા દ્વારા અભિનંદન પાઠવી આગામી તબક્કા માટે શુભેચ્છાઓ આપવામાં આવી હતી. તજજ્ઞોની ઉપસ્થિતિમાં મૂલ્યાંકન કાર્યક્રમમાં ડૉ. મનોજભાઈ ગોગીવાલા તથા ડૉ. હરેશભાઈ પટેલ, પ્રિન્સિપાલ, એમ.એડ. કોલેજ, મોડાસાની વિશેષ ઉપસ્થિતિ રહી હતી. વિદ્યાર્થીઓની રજૂઆતોનું મૂલ્યાંકન કરવા માટે સાયન્સ કોલેજના પ્રોફેસર ડૉ. દિનેશભાઈ ફૂદાણી અને તન્મય પ્રજાપતિએ નિર્ણાયક તરીકે સેવા આપી હતી. વિદ્યાર્થીઓના વિષયજ્ઞાન, વૈજ્ઞાનિક અભિગમ, રજૂઆતની પદ્ધતિ, વિષયની સમજ તથા પ્રશ્નોના જવાબ સહિતના વિવિધ પાસાઓને ધ્યાનમાં રાખીને મૂલ્યાંકન કરવામાં આવ્યું હતું. રાજ્ય કક્ષાની સ્પર્ધા માટે બે વિદ્યાર્થીઓની પસંદગી જિલ્લા કક્ષાએ પ્રથમ અને દ્વિતીય ક્રમે વિજેતા થયેલા વિદ્યાર્થીઓ હવે આગામી તબક્કામાં રાજ્ય કક્ષાએ પોતાના પ્રોજેક્ટ/પ્રેઝન્ટેશન રજૂ કરશે. જિલ્લા કક્ષાની આ સ્પર્ધા વિદ્યાર્થીઓ માટે રાજ્ય કક્ષાની સ્પર્ધા તરફ આગળ વધવાની મહત્વપૂર્ણ તક બની છે. સમગ્ર આયોજન દ્વારા વિદ્યાર્થીઓમાં વિજ્ઞાન પ્રત્યે જિજ્ઞાસા, સંશોધનાત્મક વિચારસરણી અને દેશના ભાવિ વિકાસમાં ઊર્જાની ભૂમિકા અંગે જાગૃતિ કેળવવાનો સુંદર પ્રયાસ કરવામાં આવ્યો હતો. તસવીર અને અહેવાલ : મયંકભાઈ સોની, મોડાસા ???? 9898245145

‘સેવાના રંગ, રાષ્ટ્રના સંગ’થી રંગાયું અરવલ્લી શામળાજી મંદિર પરિસર અને મોડાસાના ઓધારી તળાવ ખાતે કુદરતી સામગ્રીથી આકર્ષક રંગોળીનું સર્જન ફૂલો, કઠોળ અને વિવિધ બીજના સર્જનાત્મક ઉપયોગથી સેવા, સમૃદ્ધિ, સ્વાવલંબન અને રાષ્ટ્રભાવનાનો સંદેશ મોડાસા, તા. 18: સેવા સંકલ્પ અભિયાન અંતર્ગત ‘સેવાના રંગ, રાષ્ટ્રના સંગ’ કાર્યક્રમના ભાગરૂપે અરવલ્લી જિલ્લામાં સેવા, સ્વાવલંબન અને રાષ્ટ્રભાવનાનો અનોખો સંદેશ આપતી સર્જનાત્મક પ્રવૃત્તિ યોજાઈ હતી. શામળાજી મંદિર પરિસર તેમજ મોડાસાના ઓધારી તળાવ ખાતે સ્થાનિક અને કુદરતી સામગ્રીનો ઉપયોગ કરીને સુંદર તથા આકર્ષક રંગોળીઓ તૈયાર કરવામાં આવી હતી. આ રંગોળીઓમાં પરંપરાગત રંગોના સ્થાને ફૂલો, વિવિધ પ્રકારના કઠોળ, અનાજ અને બીજ જેવી સ્થાનિક કૃષિ પેદાશો તથા કુદરતી સામગ્રીનો સર્જનાત્મક ઉપયોગ કરવામાં આવ્યો હતો. રંગોળીના માધ્યમથી ભારતીય પરંપરા, સ્થાનિક પેદાશો અને રાષ્ટ્રભાવનાને એકસાથે જોડવાનો સુંદર પ્રયાસ કરવામાં આવ્યો હતો. પરંપરાગત રંગોળી કળાને સ્થાનિક કૃષિ પેદાશો સાથે સાંકળી તૈયાર કરવામાં આવેલી આ રંગોળીઓ માત્ર કલાત્મક અભિવ્યક્તિ પૂરતી સીમિત ન રહી, પરંતુ તેના માધ્યમથી ‘સ્થાનિકથી રાષ્ટ્રની સમૃદ્ધિ’નો સંદેશ પણ આપવામાં આવ્યો હતો. સ્થાનિક સ્તરે ઉપલબ્ધ કુદરતી સંસાધનો અને કૃષિ પેદાશોનો સર્જનાત્મક તથા સકારાત્મક ઉપયોગ કરીને સ્વાવલંબન તરફ આગળ વધવાની ભાવના ઉજાગર કરવામાં આવી હતી. શામળાજી મંદિર પરિસરમાં તૈયાર કરવામાં આવેલી રંગોળી યાત્રાળુઓ અને મુલાકાતીઓ માટે આકર્ષણનું કેન્દ્ર બની હતી. જ્યારે મોડાસાના ઓધારી તળાવ ખાતેની રંગોળીએ પણ લોકોનું ધ્યાન ખેંચ્યું હતું. રંગોળી નિહાળવા આવેલા લોકોએ કુદરતી સામગ્રીથી તૈયાર કરાયેલી આ અનોખી કલાની પ્રશંસા કરી હતી. ‘સેવાના રંગ, રાષ્ટ્રના સંગ’ની આ પહેલ દ્વારા સેવા માત્ર એક પ્રવૃત્તિ નહીં પરંતુ સમાજના દરેક વર્ગને જોડતી ભાવના છે તેવો સંદેશ આપવામાં આવ્યો હતો. જનભાગીદારી, સ્થાનિક પેદાશોનો ઉપયોગ, પર્યાવરણ પ્રત્યેની જાગૃતિ અને રાષ્ટ્રનિર્માણની ભાવનાને એકસાથે સાંકળી આ કાર્યક્રમ દ્વારા સેવા સંકલ્પ અભિયાનનો ઉદ્દેશ જનજન સુધી પહોંચાડવાનો પ્રયાસ કરવામાં આવ્યો હતો. કુદરતી અને સ્થાનિક સામગ્રીથી તૈયાર કરાયેલી આ રંગોળીઓએ અરવલ્લીની ધરતી પર ભારતીય સંસ્કૃતિ, કૃષિ સમૃદ્ધિ અને રાષ્ટ્રપ્રેમના રંગો પૂર્યા હતા. આ સમગ્ર આયોજનથી ‘સેવાના રંગ, રાષ્ટ્રના સંગ’ની ભાવના જીવંત બની હતી. તસવીર અને અહેવાલ :- મયંક સોની, મોડાસા મો. 9898245145