ફોટો–1: નસવાડી PPS ઈંગ્લિશ મીડિયમ સ્કૂલ ખાતે ગુરુપૂર્ણિમા નિમિત્તે વિદ્યાર્થીઓએ માતા-પિતાના કંકુ પગલાંની પૂજા કરી આદર વ્યક્ત કર્યો.

નસવાડી PPS ઈંગ્લિશ મીડિયમ સ્કૂલ ખાતે ગુરુપૂર્ણિમાની ભાવભીની ઉજવણી વિદ્યાર્થીઓએ માતા-પિતાના કંકુ પગલાંની પૂજા કરી, શિક્ષકોને ગુરુ માની ચરણસ્પર્શ કરીને વ્યક્ત કર્યો આદર નસવાડી પ્રતિનિધિ નસવાડી સ્થિત PPS ઈંગ્લિશ મીડિયમ સ્કૂલ ખાતે ગુરુપૂર્ણિમા નિમિત્તે ભક્તિ, સંસ્કાર અને ગુરુવંદનાનો ભાવસભર કાર્યક્રમ યોજાયો હતો. કાર્યક્રમમાં વિદ્યાર્થીઓએ અનોખી રીતે પોતાના માતા-પિતાના કોરા રૂમાલ પર કંકુના પગલાં કરાવી તેમની પૂજા કરી હતી. આ અનોખા આયોજન દ્વારા વિદ્યાર્થીઓમાં માતા-પિતા અને ગુરુજનો પ્રત્યે આદરભાવ તેમજ ભારતીય સંસ્કૃતિના મૂલ્યોનું સિંચન કરવામાં આવ્યું હતું. કાર્યક્રમ દરમિયાન વિદ્યાર્થીઓએ પોતાના શિક્ષકોને ગુરુ માની તેમના ચરણસ્પર્શ કરીને આશીર્વાદ મેળવ્યા હતા. સમગ્ર કાર્યક્રમને સફળ બનાવવા માટે શાળાના શિક્ષકગણે ખૂબ જ મહેનત કરી હતી, જેના પરિણામે કાર્યક્રમ ભવ્ય અને યાદગાર બન્યો હતો. આ પ્રસંગે વિદ્યાર્થીઓએ ગુરુના મહિમાનું વર્ણન કરતાં જણાવ્યું હતું કે, "ગુરુ એ એવી વ્યક્તિ છે જે જીવનમાંથી અજ્ઞાનનો અંધકાર દૂર કરીને જ્ઞાનનો પ્રકાશ ફેલાવે છે. માતા-પિતા આપણને જન્મ આપે છે, જ્યારે ગુરુ આપણને સારું જીવન જીવવાની દિશા બતાવે છે. તેઓ માર્ગદર્શન, પ્રેરણા અને સંસ્કાર આપીને સારા નાગરિક બનવામાં મહત્વની ભૂમિકા ભજવે છે. આ પવિત્ર દિવસે અમે અમારા તમામ શિક્ષકો પ્રત્યે તેમના પ્રેમ, ધૈર્ય અને નિઃસ્વાર્થ સેવાના બદલ હૃદયપૂર્વક આભાર વ્યક્ત કરીએ છીએ." કાર્યક્રમના અંતે પ્રિન્સિપાલે વિદ્યાર્થીઓને ગુરુપૂર્ણિમાની શુભેચ્છાઓ પાઠવી હતી અને જીવનમાં ગુરુ તથા માતા-પિતાના સન્માનનું મહત્વ સમજાવ્યું હતું. સમગ્ર કાર્યક્રમ શ્રદ્ધા, સંસ્કાર અને ઉત્સાહભર્યા વાતાવરણમાં સંપન્ન થયો હતો.