ગિરનારની પવિત્ર ભૂમિ જૂનાગઢ ખાતે ધાર્મિક ઉત્સાહ અને સેવાભાવનો ઉત્કૃષ્ટ સંગમ જોવા મળ્યો છે.ગુરુપૂર્ણિમાના પવિત્ર પર્વે ભવનાથ ખાતે અન્નક્ષેત્રનો પ્રારંભ કરાયો હતો. ભવનાથ પોલીસ ચોકી પાસે ગુરુપૂર્ણિમા નિમિત્તે ધ્યાન સેવા કેન્દ્ર ને સહયોગ કરી ભક્તો માટે મહાપ્રસાદની વ્યવસ્થા કરાઈ હતી.આયોજકો અને ગુરુજનોને ખેસ અર્પણ કરી સન્માનિત કરેલ આ અન્નક્ષેત્રનો મુખ્ય ઉદ્દેશ્ય ગિરનાર ધામ ખાતે દર્શનાર્થે આવતા તમામ યાત્રાળુઓ અને સંતોને પ્રસાદ તથા ભોજન સેવા પૂરી પાડવાનો રહ્યો હતો. સવારથી જ શરૂ થયેલા આ અન્નક્ષેત્રમાં મો

જિલ્લા માર્ગ સલામતી સમિતિ, સુરત જિલ્લા વહીવટીતંત્ર અને પ્રાદેશિક વાહન વ્યવહાર કચેરી (RTO)ના સંયુક્ત ઉપક્રમે માર્ગ સલામતી અંગે જનજાગૃતિ ફેલાવવા માટે આગામી 1 ઓગસ્ટના રોજ બારડોલી તાલુકાના સાંકરી સ્થિત સ્વામિનારાયણ મંદિર ખાતે મેગા હેલ્મેટ વિતરણ કાર્યક્રમ યોજવામાં આવશે. કાર્યક્રમ દરમિયાન આશરે 1,500 જેટલા વિદ્યાર્થી-વિદ્યાર્થીનીઓને વિનામૂલ્યે હેલ્મેટનું વિતરણ કરવામાં આવશે. આ અભિયાનનો મુખ્ય હેતુ યુવાનોમાં હેલ્મેટ પહેરવાની આદત વિકસાવવી તેમજ માર્ગ અકસ્માતોમાં થતા મૃત્યુ અને ગંભીર ઇજાઓમાં ઘટાડો લાવવાનો છે. બારડોલી આર.ટી.ઓ. કચેરી ખાતે યોજાયેલી પત્રકાર પરિષદમાં માહિતી આપતાં અધિકારી સી.ડી. પટેલે જણાવ્યું હતું કે, ગુજરાત રાજ્યમાં નોંધાતા માર્ગ અકસ્માતોમાં દ્વિચક્રી વાહનચાલકોના મૃત્યુ અને ગંભીર ઇજાઓના પ્રમાણમાં સુરત જિલ્લો ચિંતાજનક સ્થિતિમાં છે. અકસ્માતોના મોટાભાગના બનાવોમાં હેલ્મેટ વગર વાહન ચલાવવાના કારણે માથાના ભાગે ગંભીર અને જીવલેણ ઇજાઓ થતી હોવાનું સામે આવ્યું છે. તેમણે વધુમાં જણાવ્યું હતું કે, ખાસ કરીને શાળા અને કોલેજોમાં અભ્યાસ કરતા અનેક વિદ્યાર્થીઓ હેલ્મેટ વિના દ્વિચક્રી વાહન ચલાવતા જોવા મળે છે. આ પરિસ્થિતિને ધ્યાનમાં રાખીને માર્ગ સલામતી અંગે જાગૃતિ લાવવા અને યુવાનોમાં જવાબદારીની ભાવના વિકસે તે માટે આ વિશેષ કાર્યક્રમનું આયોજન કરવામાં આવ્યું છે. કાર્યક્રમમાં જિલ્લા કલેક્ટર, જિલ્લા પોલીસ વડા, પ્રાદેશિક વાહન વ્યવહાર કચેરીના વરિષ્ઠ અધિકારીઓ, જિલ્લા માર્ગ સલામતી સમિતિના સભ્યો તેમજ વિવિધ શૈક્ષણિક સંસ્થાઓના પ્રતિનિધિઓ ઉપસ્થિત રહેશે. વિદ્યાર્થીઓને માત્ર હેલ્મેટનું વિતરણ જ નહીં, પરંતુ માર્ગ સલામતીના નિયમો, ટ્રાફિક શિસ્ત અને સુરક્ષિત વાહનચાલન અંગે માર્ગદર્શન પણ આપવામાં આવશે. આગામી સમયમાં બારડોલી પ્રદેશમાં દ્વિચક્રી વાહન ચલાવતા, માન્ય ડ્રાઇવિંગ લાયસન્સ ધરાવતા પરંતુ નિયમિત હેલ્મેટનો ઉપયોગ ન કરતા વિદ્યાર્થીઓનો સર્વે હાથ ધરી તેમની નોંધણી કરવાની પણ યોજના તૈયાર કરવામાં આવી છે. આ માટે બારડોલી વિસ્તારની વિવિધ શૈક્ષણિક સંસ્થાઓમાં નોંધણીની કામગીરી પૂર્ણ થઈ ચૂકી હોવાનું અધિકારીઓએ જણાવ્યું હતું. માર્ગ અકસ્માતોમાં માનવજીવનની સુરક્ષા સર્વોપરી છે તે સંદેશ સાથે યોજાનારો આ મેગા હેલ્મેટ વિતરણ કાર્યક્રમ યુવાનોમાં ટ્રાફિક નિયમો પ્રત્યે જાગૃતિ લાવશે અને સુરક્ષિત વાહનચાલનની સંસ્કૃતિ વિકસાવવામાં મહત્વપૂર્ણ સાબિત થશે. બારડોલી આર.ટી.ઓ. કચેરી દ્વારા માર્ગ સલામતી માટે અપનાવવામાં આવેલો આ નવતર અને લોકહિતનો અભિગમ સર્વત્ર પ્રશંસનીય માનવામાં આવી રહ્યો છે.

સુરત જિલ્લાના પલસાણા તાલુકાના બલેશ્વર ગામે આવેલી હાઈફાઈ સિક્યુરિટી ધરાવતી અવધ સાંગ્રિલા સોસાયટીમાં રાત્રિના સમયે JCB મશીન ઘૂસી જઈ બંગલાના શેડમાં તોડફોડ કરી જતા ચકચાર મચી જવા પામી છે. સોસાયટીમાં વોચમેન તેમજ CCTV કેમેરાની સુરક્ષા વ્યવસ્થા હોવા છતાં આ રીતે JCB સોસાયટીની અંદર કેવી રીતે પ્રવેશ્યું અને કોણે તેને પ્રવેશ અપાવ્યો તે અંગે અનેક સવાલો ઊભા થયા છે. મળતી માહિતી મુજબ, પલસાણા તાલુકાના કરણ ગામે રહેતા અરુણભાઈ દુબેએ અવધ સાંગ્રિલા સોસાયટીમાં આવેલો બંગલો નંબર-139 વેચાણથી લીધો હતો. હાલ આ બંગલામાં રિનોવેશનનું કામ ચાલી રહ્યું હતું. દરમિયાન બુધવારે રાત્રે આશરે સાડા દસ વાગ્યાના અરસામાં એક JCB મશીન સોસાયટીના મુખ્ય ગેટમાંથી અંદર પ્રવેશ્યું હતું. JCB દ્વારા બંગલા નંબર-139ના શેડમાં તોડફોડ કરવામાં આવી હતી અને ત્યારબાદ JCB સોસાયટીમાંથી નીકળી ગયું હતું. આશ્ચર્યજનક બાબત એ છે કે આ સમગ્ર ઘટનાક્રમ દરમિયાન સોસાયટીના CCTV કેમેરા પણ બંધ થઈ ગયા હોવાનું સામે આવ્યું છે. જેના કારણે ઘટનાને લઈને વધુ શંકા ઊભી થઈ છે કે CCTV કેમેરા ટેક્નિકલ કારણસર બંધ થયા હતા કે પછી જાણપૂર્વક બંધ કરવામાં આવ્યા હતા. ઘટનાની જાણ ગુરુવારે વહેલી સવારે થતાં બંગલા માલિક તથા સોસાયટીના રહીશો ઘટનાસ્થળે પહોંચ્યા હતા. બંગલાના શેડમાં તોડફોડ થયેલી જોઈ તાત્કાલિક 112 ઇમરજન્સી નંબર પર જાણ કરવામાં આવી હતી. માહિતી મળતાં પોલીસની ટીમ સ્થળ પર પહોંચી હતી. ત્યારબાદ સમગ્ર મામલે પલસાણા પોલીસને જાણ કરવામાં આવતા પોલીસે પણ સ્થળની મુલાકાત લઈ તપાસનો ધમધમાટ શરૂ કર્યો છે. હાલ પલસાણા પોલીસ દ્વારા સોસાયટીમાં લગાવવામાં આવેલા CCTV કેમેરાના ફૂટેજ, સોસાયટીના પ્રવેશ-નિર્ગમની વિગતો, વોચમેનની પૂછપરછ તેમજ JCB મશીન અંગેની માહિતી એકત્ર કરવાની કાર્યવાહી હાથ ધરવામાં આવી હોવાનું જાણવા મળે છે. ઉલ્લેખનીય છે કે, આ જ સોસાયટીમાં અગાઉ લાખો રૂપિયાની ચોરીના મામલાનો ભેદ હજુ અકબંધ હોવાની સ્થિતિ વચ્ચે ફરી એક વખત રાત્રિના સમયે JCB સોસાયટીમાં ઘૂસી જતાં સિક્યુરિટી વ્યવસ્થાને લઈને સોસાયટીના રહીશોમાં પણ ચિંતા ફેલાઈ છે. હાઈ સિક્યુરિટી ધરાવતી સોસાયટીમાં મુખ્ય ગેટમાંથી JCB અંદર પ્રવેશી બંગલાના શેડમાં તોડફોડ કરીને બહાર નીકળી જતાં પોલીસ તપાસમાં આ ઘટનાનું ચોક્કસ કારણ શું છે અને JCB કોણ લઈ આવ્યું હતું તે સામે આવવાનું બાકી છે.

સતલાસણા એસટી સ્ટેન્ડનું કંટ્રોલ પોઇન્ટ તાત્કાલિક શરૂ કરવા અને બંધ કરાયેલી બસ સેવાઓ પુનઃ શરૂ કરવાની ઉગ્ર માંગ સતલાસણા તાલુકા પંચાયતના સભ્ય (સતલાસણા-1) તથા વિસ્તારના રહીશ તરીકે ગુજરાત રાજ્ય માર્ગ વાહન વ્યવહાર નિગમ (એસટી)ના સંબંધિત અધિકારીઓને લેખિત રજૂઆત કરવામાં આવી છે કે સતલાસણા એસટી સ્ટેન્ડ ખાતે અગાઉ કાર્યરત કંટ્રોલ પોઇન્ટને તાત્કાલિક ફરી શરૂ કરવામાં આવે તેમજ સતલાસણાથી મહેસાણા જતી સવારે બંધ કરાયેલી બસ સેવા અને સતલાસણા કંટ્રોલ પોઇન્ટ પર આવતી તમામ લોકલ તથા એક્સપ્રેસ બસોની અવરજવર પુનઃ શરૂ કરવામાં આવે. સતલાસણા તાલુકા મથક હોવાથી દરરોજ મોટી સંખ્યામાં વિદ્યાર્થીઓ, નોકરીયાત વર્ગ, દર્દીઓ, ખેડૂતો તથા સામાન્ય મુસાફરો એસટી બસ સેવા પર નિર્ભર છે. વિદ્યાર્થીઓ વિસનગર, મહેસાણા સહિતના શહેરોમાં અભ્યાસ માટે, જ્યારે દર્દીઓ સારવાર માટે મોટા શહેરોની હોસ્પિટલોમાં અને અનેક મુસાફરો અમદાવાદ સહિત અન્ય સ્થળોએ જવા માટે એસટી સેવાનો ઉપયોગ કરે છે. અગાઉ સતલાસણા ગામની અંદર આવેલા એસટી કંટ્રોલ પોઇન્ટ પર લોકલ અને એક્સપ્રેસ બસો નિયમિત આવતી-જતી હતી, પરંતુ છેલ્લા કેટલાક સમયથી કંટ્રોલ પોઇન્ટ બંધ કરી દેવામાં આવતા તમામ બસો સતલાસણા ચાર રસ્તા હાઇવે પરથી જ પસાર થઈ જાય છે. જેના કારણે મુસાફરોને ભારે હાલાકીનો સામનો કરવો પડી રહ્યો છે. ખાસ કરીને વિદ્યાર્થીઓ, મહિલાઓ, વૃદ્ધો, દિવ્યાંગો, દર્દીઓ અને નોકરીયાત લોકોને એકથી બે કિલોમીટર સુધીનું અંતર કાપીને હાઇવે સુધી પહોંચવું પડે છે, જે ખૂબ જ મુશ્કેલ અને જોખમી સ્થિતિ સર્જે છે. ચોમાસા અને ઉનાળાના સમયમાં આ મુશ્કેલી વધુ ગંભીર બની જાય છે. આથી એસટી નિગમને માંગ કરવામાં આવી છે કે જનહિતને ધ્યાનમાં રાખીને સતલાસણા એસટી સ્ટેન્ડનું કંટ્રોલ પોઇન્ટ તાત્કાલિક શરૂ કરવામાં આવે, સતલાસણાથી મહેસાણા જતી સવારે બંધ કરાયેલી બસ સેવા પુનઃ શરૂ કરવામાં આવે તેમજ અગાઉની જેમ તમામ લોકલ અને એક્સપ્રેસ બસોને સતલાસણા કંટ્રોલ પોઇન્ટ સુધી લાવવામાં આવે, જેથી વિસ્તારના હજારો મુસાફરોને રાહત મળી શકે. જો આ રજૂઆત અંગે તાત્કાલિક હકારાત્મક નિર્ણય લેવામાં નહીં આવે તો સ્થાનિક લોકો, વિદ્યાર્થીઓ અને મુસાફરો સાથે લોકશાહી ઢબે આગામી કાર્યક્રમ અંગે વિચારણા કરવામાં આવશે.

સોમાભાઈ. જે. રાવળ. ભાભર સંત શિરોમણી ગુરુ રવિદાસ મહારાજની 650મી જન્મજયંતિ નિમિત્તે સમરસતા સંકલ્પ અભિયાન અંતર્ગત ભાભર તાલુકાના બલોઘણ ગામ સ્થિત આલમગીરી આશ્રમ ખાતે ભવ્ય દીપોત્સવ કાર્યક્રમનું આયોજન કરવામાં આવ્યું હતું. કાર્યક્રમમાં સંતશ્રીના જીવનમૂલ્યો, સમરસતા, સમાનતા અને માનવસેવાના સંદેશને યાદ કરી શ્રદ્ધાંજલિ અર્પણ કરવામાં આવી હતી. આ પ્રસંગે ગુજરાત રાજ્ય સરકારના માનનીય મંત્રીશ્રી સ્વરૂપજી ઠાકોર, યુવા ભાજપ પ્રભારી મહેન્દ્રસિંહ ચૌહાણ તથા ભાજપના આગેવાનો અને સમગ્ર ટીમની ગૌરવપૂર્ણ ઉપસ્થિતિએ કાર્યક્રમને વિશેષ ભવ્યતા અને ગૌરવ પ્રદાન કર્યું હતું. મહાનુભાવોએ પોતાના સંબોધનમાં સંત ગુરુ રવિદાસ મહારાજના જીવનચરિત્ર અને તેમના દ્વારા આપવામાં આવેલા સમરસ સમાજના સંદેશને આજના સમયમાં પણ એટલો જ પ્રાસંગિક ગણાવી સમાજમાં એકતા, ભાઈચારો અને માનવતાના મૂલ્યોને મજબૂત બનાવવાનો સંકલ્પ વ્યક્ત કર્યો હતો. કાર્યક્રમ દરમિયાન દીપ પ્રજ્વલન કરી દીપોત્સવની ઉજવણી કરવામાં આવી હતી. ભજન-કીર્તન અને ધાર્મિક કાર્યક્રમો દ્વારા સમગ્ર વાતાવરણ ભક્તિમય બની ગયું હતું. મોટી સંખ્યામાં ગ્રામજનો, શ્રદ્ધાળુઓ, સમાજના આગેવાનો, યુવાનો તથા મહિલાઓ ઉપસ્થિત રહી કાર્યક્રમને સફળ બનાવ્યો હતો. સમગ્ર કાર્યક્રમનું આયોજન સુચારૂ રીતે સંપન્ન થયું હતું અને ઉપસ્થિત સૌએ સંત ગુરુ રવિદાસ મહારાજના આદર્શોને જીવનમાં ઉતારવાનો સંકલ્પ વ્યક્ત કર્યો હતો.

કવાંટના પોલિસકર્મી દ્વારા વિદ્યાર્થીઓને ચોપડા વિતરણ કરાયું. ગ્રામિણ આદિવાસી વિદ્યાર્થીઓને મદદરૂપ થવાની મંશા દાખવીને તા. 30/07/2026ના રોજ કવાંટ પોલિસ વિભાગના બીટ જમાદારશ્રી મહેશભાઇ મકવાણા દ્વારા જામલી વગુદણ, નવાલજા, રેણધા અને ઉમઠી જેવા ગામોમાં દિશા ડૉન બૉસ્કો કવાંટ દ્વારા ધોરણ 1 થી 5 માટે નિઃશુલ્કમાં ચાલતા ટ્યુશન વર્ગોના વિદ્યાર્થીઓને ચોપડો, પેન્સિલ, ઇરેઝર તથા ચોકલેટનું વિતરણ કરવામાં આવ્યું હતું સાથોસાથ જામલી પંચાયતની નજીકમાં વૃક્ષારોપણ પણ કરવામાં આવ્યું હતું. આ પ્રસંગે જામલીના સરપંચશ્રી પ્રેમસિંગભાઇ, કવાંટ તાલુકા પંચાયતના સભ્યશ્રી વિરંગભાઇ, દિશા ડૉન બૉસ્કો કવાંટના પ્રોગ્રામ ઓફિસર હસમુખભાઇ, દિશા સ્ટાફ અજયભાઇ, ગ્રામજનો તથા વિદ્યાર્થીઓ ઉપસ્થિત રહ્યાં હતા.