દાંતા ખાતે આધારકાર્ડ અપડેટના નામે વધુ ફી વસૂલાતનો આક્ષેપ: મામલતદાર સાહેબ શ્રી ને લેખિત ફરિયાદ, તપાસની માંગ

દાંતા, બનાસકાંઠા બનાસકાંઠા જિલ્લાના દાંતા તાલુકામાં આધારકાર્ડ અપડેટના નામે સરકાર દ્વારા નિર્ધારિત ફી કરતાં વધુ રકમ વસૂલાત થતી હોવાના ગંભીર આક્ષેપો સામે આવ્યા છે. આ મામલે પાણોદરા ગામના રહેવાસી પરમાર રાજાજી કેશાજીએ દાંતા મામલતદાર સાહેબ શ્રી ને લેખિત અરજી આપી સંબંધિત આધાર સેન્ટર અને ઓપરેટર સામે કાયદેસરની કાર્યવાહી કરવાની માંગ કરી છે. અરજીમાં જણાવ્યા મુજબ, અરજદાર ગત ૩ માર્ચ, ૨૦૨૬ના રોજ દાંતા ખાતે હડાદ રોડ પર આવેલા ફિનો પેમેન્ટ બેંકના આધાર કેન્દ્રમાં પોતાના પુત્રોના આધારકાર્ડમાં ડેમોગ્રાફિક અપડેટ કરાવવા ગયા હતા. સરકાર દ્વારા ડેમોગ્રાફિક અપડેટ માટે નિર્ધારિત ફી રૂ. ૭૫ નક્કી કરવામાં આવી હોવા છતાં, ઓપરેટરે પ્રતિ અપડેટ રૂ. ૧૫૦ વસૂલ્યાનો આક્ષેપ કરવામાં આવ્યો છે. ફરિયાદમાં વધુમાં એવો પણ દાવો કરવામાં આવ્યો છે કે આધારકાર્ડમાં એક સાથે અનેક અપડેટ શક્ય હોવા છતાં માત્ર એક જ અપડેટ કરીને અરજદારોને વારંવાર બોલાવવામાં આવે છે અને દરેક વખતે અલગથી વધુ ફી વસૂલવામાં આવે છે. આ પ્રથાથી ગરીબ અને આદિવાસી પરિવારોને આર્થિક નુકસાન સહન કરવું પડે છે. અરજદારે રજૂઆતમાં જણાવ્યું છે કે હાલ શાળામાં અભ્યાસ કરતા બાળકો માટે વિવિધ સરકારી યોજનાઓ અને સ્કોલરશીપ મેળવવા આધારકાર્ડ અપડેટ ફરજિયાત બન્યું છે. જો સમયસર અપડેટ ન થાય તો વિદ્યાર્થીઓ સરકારી લાભોથી વંચિત રહી શકે છે. ફરિયાદ સાથે આધાર અપડેટની પાવતીઓ પણ પુરાવા તરીકે રજૂ કરવામાં આવી છે. અરજીની નકલ નાયબ કલેક્ટર, દાંતા તથા જિલ્લા કલેક્ટર, બનાસકાંઠાને પણ મોકલવામાં આવી હોવાનું જણાવાયું છે. મામલતદાર કચેરી, દાંતા દ્વારા ફરિયાદ સ્વીકારી લેવામાં આવી હોવાનું અરજદારે જણાવ્યું છે. હવે સમગ્ર મામલે તંત્ર દ્વારા તપાસ હાથ ધરવામાં આવે છે કે નહીં અને આક્ષેપોની સત્યતા અંગે શું કાર્યવાહી થાય છે તેના પર સૌની નજર છે. નોંધ: ઉપરોક્ત સમાચાર અરજદાર દ્વારા રજૂ કરાયેલી લેખિત ફરિયાદ અને જોડાયેલા દસ્તાવેજોના આધારે તૈયાર કરવામાં આવ્યા છે. આક્ષેપો અંગે સંબંધિત આધાર કેન્દ્ર અથવા ઓપરેટરનો પક્ષ ઉપલબ્ધ નથી. તંત્રની તપાસ બાદ હકીકત સ્પષ્ટ થશે.