તમામ કર્મચારીઓ કામગીરીથી અળગા રહ્યા, કચેરી બહાર સૂત્રોચ્ચાર કરી સરકાર સામે રોષ વ્યક્ત કર્યો
હિંમતનગર: સાબરકાંઠા જિલ્લામાં ફરજ બજાવતા જમીન દફતર વિભાગના કર્મચારીઓ પોતાની પડતર માગણીઓના નિરાકરણની માંગ સાથે સોમવાર, તા. ૨૧ સપ્ટેમ્બરથી અચોક્કસ મુદ્દતની હડતાળમાં જોડાતા જમીન દફતર વિભાગની કામગીરી પર અસર જોવા મળી હતી. કર્મચારીઓએ કામગીરીનો સંપૂર્ણ બહિષ્કાર કરી કચેરી બહાર એકત્ર થઈ સરકાર સામે સૂત્રોચ્ચાર કરી ઉગ્ર વિરોધ નોંધાવ્યો હતો.
સમગ્ર ગુજરાતમાં જમીન દફતર વિભાગના કર્મચારીઓ દ્વારા વિવિધ પડતર પ્રશ્નો, ખાસ કરીને ગ્રેડ પે સહિતની માગણીઓને લઈ તબક્કાવાર આંદોલન ચલાવવામાં આવી રહ્યું છે. અગાઉ પેનડાઉન સહિતના ગાંધીચીંધ્યા કાર્યક્રમો યોજ્યા બાદ પણ માગણીઓનું સંતોષકારક નિરાકરણ ન આવતાં હવે કર્મચારીઓએ અચોક્કસ મુદ્દતની હડતાળનું શસ્ત્ર ઉગામ્યું છે.
સાબરકાંઠા જિલ્લામાં પણ જમીન દફતર વિભાગના કર્મચારીઓ મોટી સંખ્યામાં હડતાળમાં જોડાયા હતા. કર્મચારીઓએ કચેરીની કામગીરીથી અળગા રહી પોતાની માંગણીઓના સમર્થનમાં કચેરી બહાર એકત્ર થઈ સૂત્રોચ્ચાર કર્યા હતા. જેના પગલે જમીન દફતર સંબંધિત કામગીરીને અસર થવાની સ્થિતિ ઊભી થઈ છે.
કર્મચારીઓનું કહેવું છે કે લાંબા સમયથી પડતર રહેલી માગણીઓ અંગે સરકાર સમક્ષ રજૂઆતો અને આંદોલનાત્મક કાર્યક્રમો યોજવા છતાં પ્રશ્નોનો અંતિમ ઉકેલ આવ્યો નથી. પરિણામે હવે કર્મચારીઓએ અચોક્કસ મુદ્દતની હડતાળ શરૂ કરી સરકાર સુધી પોતાનો અવાજ પહોંચાડવાનો પ્રયાસ કર્યો છે.
આ વિરોધ કાર્યક્રમમાં પંકજભાઈ પરમાર, શૈલેષભાઈ પટેલ, અંકિતભાઈ પટેલ સહિત જમીન દફતર વિભાગના કર્મચારીઓ જોડાયા હતા. પડતર માગણીઓનો વહેલી તકે નિકાલ નહીં આવે ત્યાં સુધી આંદોલન ચાલુ રાખવાની કર્મચારીઓની ભૂમિકાને પગલે આગામી દિવસોમાં આ હડતાળ વધુ ઉગ્ર બને તેવી સ્થિતિ સર્જાઈ છે.
