ભારતીય સ્વદેશી રમત ડ્રોપ રોબોલના 18મા સ્થાપના દિવસ નિમિત્તે શ્રી કે. આર. કટારા આર્ટ્સ કોલેજ, શામળાજી તથા ભગીની સંસ્થાઓના સંયુક્ત ઉપક્રમે ભવ્ય ઉજવણીનું આયોજન કરવામાં આવ્યું હતું. રમતના પ્રચાર-પ્રસાર અને વિકાસના ઉમદા સંકલ્પ સાથે યોજાયેલા આ કાર્યક્રમમાં તમામ અધ્યાપકો, બિનશૈક્ષણિક કર્મચારીઓ તથા વિદ્યાર્થીઓએ ઉત્સાહભેર ભાગ લીધો હતો.
કાર્યક્રમમાં ગુજરાત રાજ્ય ડ્રોપ રોબોલ એસોસિએશનના મહાસચિવ ડૉ. અજીતસિંહ આર. ચૌહાણ વિશેષ ઉપસ્થિત રહ્યા હતા. તેમણે ઉપસ્થિત વિદ્યાર્થીઓને ડ્રોપ રોબોલ રમતના ઇતિહાસ, નિયમો, રમવાની પદ્ધતિ, ખેલાડીઓની સંખ્યા તથા રમતની વિવિધ સ્પર્ધાત્મક કક્ષાઓ વિશે વિસ્તૃત માહિતી આપી હતી.
તેમણે જણાવ્યું હતું કે ડ્રોપ રોબોલ એ ભારતની માટીમાંથી જન્મેલી સ્વદેશી રમત છે. આ રમતને જિલ્લા, રાજ્ય, શાળા, યુનિવર્સિટી, રાષ્ટ્રીય, ફેડરેશન તથા આંતરરાષ્ટ્રીય કક્ષાએ વધુને વધુ પ્રોત્સાહન મળે તે માટે સૌએ સહિયારા પ્રયાસો કરવા જોઈએ. જે રીતે યોગને આજે વિશ્વભરમાં ઓળખ મળી છે અને 21 જૂનને આંતરરાષ્ટ્રીય યોગ દિવસ તરીકે ઉજવવામાં આવે છે, તેવી જ રીતે ડ્રોપ રોબોલને પણ વૈશ્વિક ઓળખ મળે તે દિશામાં પ્રયત્નશીલ બનવા તેમણે આહ્વાન કર્યું હતું.
તેમણે વધુમાં જણાવ્યું હતું કે આ રમત ખૂબ જ ઓછા ખર્ચે સામાન્ય મેદાનમાં પણ રમી શકાય છે. હાથ અને નાના દડાના તાલમેલથી રમાતી આ રમત શારીરિક ક્ષમતા, એકાગ્રતા, ચપળતા અને ટીમવર્ક વિકસાવવામાં મદદરૂપ બને છે. આપણી સ્વદેશી રમતને દેશ-વિદેશમાં ઓળખ અપાવીને ભારતીય તિરંગો આંતરરાષ્ટ્રીય રમતગમતના મેદાનમાં ગૌરવભેર લહેરાય તે માટે યુવા પેઢીએ આગળ આવવું જોઈએ.
આ પ્રસંગે શ્રી કે. આર. કટારા આર્ટ્સ કોલેજના પ્રિન્સિપાલ ડૉ. એ. કે. પટેલે 18મા સ્થાપના દિવસની શુભેચ્છાઓ પાઠવી હતી. તેમણે રમતગમતના માધ્યમથી વિદ્યાર્થીઓમાં સહકાર, ટીમવર્ક, શિસ્ત અને ખેલદિલી જેવા ગુણો વિકસે તે અંગે પ્રેરણાદાયી માર્ગદર્શન આપ્યું હતું.
કેળવણી મંડળના મંત્રીશ્રી દિલીપભાઈ કટારાએ પણ વિદ્યાર્થીઓને જીવનમાં સંગઠનભાવના, સહકાર અને ખેલદિલી જેવા મૂલ્યો અપનાવવા પ્રેરિત કર્યા હતા.
કાર્યક્રમમાં પ્રો. ડૉ. સમીરભાઈ, પ્રો. વી. કે. ગાવિત, બી.એડ. કોલેજનાં પ્રિન્સિપાલ કારમિલીબેન, પી.ટી.સી. કોલેજનાં પ્રિન્સિપાલ રૂબીનાબેન, પ્રોફેસર જતીનભાઈ, જોટેન્સ, સંજયભાઈ, રામજીભાઈ પટેલ, રામસિંહ સહિત આર્ટ્સ કોલેજના વિદ્યાર્થીઓ, પી.ટી.સી. કોલેજના તાલીમાર્થીઓ તેમજ એસ.આઈ., એમ.એસ.ડબલ્યુ., નર્સિંગ અને બી.એડ. કોલેજના વિદ્યાર્થીઓ મોટી સંખ્યામાં ઉપસ્થિત રહ્યા હતા.
સમગ્ર કાર્યક્રમ આનંદમય, ઉત્સાહપૂર્ણ અને પ્રેરણાદાયી વાતાવરણમાં સંપન્ન થયો હતો. કોલેજ પરિવારના સહિયારા પ્રયાસોથી ડ્રોપ રોબોલના 18મા સ્થાપના દિવસની ઉજવણી યાદગાર બની રહી હતી.
આપણી માટીની રમત, આપણા રાષ્ટ્રનું ગૌરવ – ડ્રોપ રોબોલનો પ્રચાર અને પ્રસાર એ સૌની સહિયારી જવાબદારી છે.
